जिजिविषा र हाम्रो दौड ...

भनिन्छ , हजार शब्दले ब्यक्त गर्न नसक्ने कुरा यौटा तस्बिरले ब्यक्त गर्छ / सोच्नुहोस त यो तस्बिरको बारेमा / एक बृद्ध घरमा बाढी पसे पछि आफ्ना सम्पति रुपी गाइको बाच्छा र बाख्रा बोकेर जीवनको जिजिविषा खोज्दै छन् / उनको घर परिवार, पारिवारिक सदस्यहरुको बारेमा त थाहा भएन, तर उनका सम्पति अरु केहि रहेनन , सुन , गहना, पैसा, लत्ता कपडा, भाँडाकुँडा अहँ अरु केहि रहेन सिर्फ़ आफुले लगाएका एकसरो भिजेका  कपडा सहितको  एक ज्यान र दुइवटा पशुलाइ कसरि सुरक्षित स्थानमा पुर्याउने उनको लक्ष्य ! प्रार्थना गरौ
भगवानले त्यो पुरा गरि दिए /  

Photo Credit: Narendra Shrestha, Twiter

केहि बर्ष पहिले अमेरिकन लेखक हेमिङ्ग वे को यौटा कथा " The Old Man and the Bridge" पढेको थिए जसमा युद्धको बेला एउटा बृद्ध आफ्ना परेवा र बाख्रालाइ छोडेर भाग्न परेको कारुणिक कथा थियो / त्यो बुढालाई तिनै जनावरको सम्झनाले मर्ने बेला सम्म सताइरहेको थियो / कथा भावुक थियो तर काल्पनिक लाग्थ्यो तर आज सामाजिक संजालमा यो फोटो हेरेपछि हेमिङ्ग वे ले लेखेको कथाका पात्र त यिनै नेपाली पो रहिछन / मात्र फरक कथाको पात्र मानब सिर्जित युद्धको त्राशबाट भागिरहेको थियो तर आज यी बुढा प्रकृतिको विनाशकारी लिला भोगिरहेका छन् /

अहिले  देश विपदमय छ / बाढीले बैशमत्त भएर के धनि के गरिब सबैका घर घर चहारेको छ/ सबैको खुसि बढारिदिएको छ/  बिपन्नहरुको बिचल्ली बनाइदिएको छ / तर यो तस्बिरले आजको बिचल्ली भन्दा पनि मानबिय समबेदनाका कुनाकन्तरालाइ कोट्याउन सफल छ/  यो मान्छेको पशु प्रेम हेर्नुस त !

अहिले सम्म उसले के गरेन होला बाच्नका लागि ! हिजोको दिनमा हरेक मान्छेले जस्तै  उसले  रिस , लोभ , लालच, झुट ,छल , जे जे गरेपनि आज उसले जे भोग्दै छ, त्यो कति कारुणिक छ,एक पटक सोचौ त !हिजोका दिन हरुमा उसले गरेका  त्यत्रो जीवन संघर्ष   र आजको दिनको जीवन संघर्षमा कति फरक छ होला ?

यो तस्बिर हेरेर को शान्तसंग बसी रहन सक्ला? त्यो मान्छेका बारेमा नसोचिरहन को सक्ला ? कस्तो दुखद परिस्थिति भोगी रहेछ आज उसले  !  फेरी कस्तो प्रेम ति पशुप्रतिको ? के उ एक्लै भाग्न सक्दैनथ्यो ? के उसको  अरु सम्पति थिएन? उसको मानवता अनि जीवनप्रतिको संघर्ष कसका  लागि प्रेरणादायी नबन्ला ?  मात्र यौटा फोटो काफी छ जीवन दर्शन बुझ्न/
 
हाम्रा दौड के का लागि? सारा काम कर्तब्य बिर्सेर, मानवता,नैतिकता र इमानलाई तिलान्जली दिदै आफ्नो स्वार्थको जोहोमा दौडि रहेकाहरुलाइ  यो तस्बिरले कति चिमोट्छ होला ?

त्यो मान्छे पशुको ज्यान बचाउन त आफ्नो ज्यान हत्केलामा राखेर मेरीमेटेको छ भने अब हामी सबैले आ-आफ्नो ठाउँबाट ति बाढीपिंडितहरुलाई  के गर्न सकिन्छ सोच्ने हो कि ?