अनुत्तरित प्रश्न

म एक भातमारा,
अँ साँच्ची अहिलेसम्म,
मैले कति बोरा चामल मल बनाए हुँला?

म एक कुम्भकर्ण,
अँ साँच्ची अहिलेसम्म,
मैले कति हजार घण्टा घुरेर  बिताए हुँला?

म एक दिनमारा,
अँ साँच्ची अहिलेसम्म,
मैले कति सय दिनको सत्यनास गरे  हुँला?

 म एक नार्किसस,
अँ साँच्ची अहिलेसम्म,
मैले आफ्नै भजनमा कति हप्ता  बिताए हुँला?

म एक नारद,
अँ साँच्ची अहिलेसम्म,
मैले कतिका कुरा काटेर महिनौ  बिताए हुँला?

म एक गणेश,
अँ साँच्ची अहिलेसम्म,
मैले कतिका वरिपरि घुमेर बर्षौ बिताए हुँला?

म एक सिसिफस,
अँ साँच्ची अहिलेसम्म,
मैले एउटै दशामा कति दशक बिताए हुँला?

म एक दुर्योधन,
अँ साँच्ची अहिलेसम्म,
मैले अहंकारका  कति कार चढे हुँला?