Naveen Marasini: लोकमान र दलहरु

हिजो आज यो देश नै लोकमानमय भएको छ / टि भी हेर्नुस , फ्लास न्युजमा लोकमान छन् , पत्रिका पद्नुस हेड लाइनमा लोकमान छन् ,एफ एम सुन्नुस लोकमान कै समाचार ! कुनै मेडिया हेर्दिन र सुन्दिन भन्दै साथीकोमा पुग्नुस फेरी प्वाक्क उसैले कुरा निकाल्छ उनै लोकमानको ! के भन्नु ? कसलाई सुनाउनु ? कसरि मुक्त हुन् सकिएला बरै यो लोकमान महामारीबाट !

(बिरालोले मुसासंग मिलेर खान थाले पछि !)

तपाई जता जानोस , जे गर्नुस लोकमानलाई यसरि प्रस्तुत गर्न लागिएको छ कि मानौ यो नेपाल यस्तो हुनुको यौटा मात्र कारण लोकमान हुन् / अब लोकमानलाइ हटाउदा सब ठिक हुन्छ भन्ने अतिरंजना पूर्ण तरिकाले सामाजिक संजाल र मेडियाहरु भरिएका छन् / लोकमानलाई गाली गर्ने ठुलो कहलिएको छ / यदि कुनै नेताले उनको विरुद्ध बोल्यो भने उ राष्ट्रबादी बनाईएको छ तर लोकमान कसरि यस्ता सर्वब्यापी र सर्वश्रेष्ठ बन्न पुगे भन्नेमा हामी कसैले चासो दिदैनौ / आज लोकमान जस्ता व्यक्ति हाम्रो समाजमा हजारौ भै सकेका छन् / आज लोकमान पात्र भन्दा पनि लोकमान बनाउने प्रवृति बढी हानिकारक भएको छ / यी त हाम्रा राजनीतिक दल सृजित प्रवृति हुन् / राजनीतिक दलहरुले समयमा हेक्का नपुर्याउदा , आफ्नो दलको मात्र स्वार्थ हेरेरे निर्णय लिदा , रास्ट्रको स्वार्थ भन्दा आफु भोलि कहाँ पुगिन्छ भन्ने दुरदर्शिता ले सिर्जना गरेको परिणाम मात्र हो यो /

लोकमान त केवल हलेदो हुन् नेपालीका लागि , एक पटक हलेदो भनेर चिने पछि कोट्याई रहन पर्दैन भन्ने नेपाली उखान छ / नेपाली जनताहरुले उनलाई चिनेको पंचायत कालमै हो, राजा ज्ञानेन्द्रका पालामा हो , ०६२/६३ पछि त यिनी कतै काम लाग्दैनन् भनेकै पनि हो तर अचम्म ! हाम्रा राजनैतिक दलहरुलाई यिनी अपरिहार्य भए / सायद लोकमानले कहिल्यै सोचेका थिएनन आफुलाई अख्तियार दुरुपयोग अनुसन्धान आयोगको आसनमा योग्य हुन्छु भनेर /

तर अफसोच त्यो कुर्चीमा बिराजमान हुने योग्यता भएको कुनै नेपाली भेटिएन हाम्रा राजनीति दलहरुका सामू / भेटियोस नि कसरि ? सबै दलले एक अर्काको बिरुद्धमा प्रयोग गर्न सकिने लोकमान बाहेक अरु पाउन गार्हो पनि थियो / अनि लोकमान ले पनि सिकिहाले कुन नेतालाई कसरि तह लाउदै आफु रमाउन सकिन्छ भनेर ! लोकमान त हाम्रा नेताहरुले गरेको भ्रस्टाचारमा मौलाएका मुला न हुन्/ बेला बेलामा लोकमानले त्रसाउछन् प्रचण्डलाई , देउवालाई अनि ओलीलाई अनुसन्धान गरिदिउ यो वा त्यो घोटालाको भनेर / अनि तै चुप मै चुप हुन्छन हाम्रा ठुला नेताहरु लोकमानका अगाडी / यिनको योग्यता अपुग थियो , त्यो कसैले हेरेन, इतिहास कालो थियो , कसैले देखेन, अनि जब उनलाई त्यो कुर्चीमा बसाईयो, सबैलाई थाहा भयो,उनि त आफुलाई सिंह ठान्दा रहिछन , कानुन भन्दा माथि सोच्दा रहिछन / ज्ञानेन्द्र लाई हटाउन गार्हो भएन, प्रचण्डलाई हटाउन परे साधारण बहुमत भए पुग्ने तर यिनलाई हटाउन २/३ चाहिने / के प्रचण्डले कहिल्यै सोचेका थिए आफुले बनाएका लोकमान को एम्बुशमा आफै पर्छु भनेर !

प्रधानमन्त्री भारत रहेको बेला लोकमान सिंह कार्कीले नेपालमा पत्रकार सम्मेलन गरी लडाकु शिविरमा भएको भ्रष्टाचारको मुद्धा ब्यूँतिने बताएपछि माओवादी मा भुकम्प आयो / त्यो बेला सरकारले शिविरको लागि दिएको चार अर्ब रुपैयाँ माओवादीका कमाण्डरहरुले बुझेर लगे । पैसा लगेर उनीहरुले कसलाई दिए ? त्यो स्पष्ट छैन । माओवादीले यो विषयलाई १२ बुँदो सम्झौता र शान्तिप्रक्रियासँग जोडेर व्याख्या गर्छन् । यदि तटस्थ भएर बोल्ने हो भने लडाकु शिविरको पैसा हिनामिना शान्तिप्रक्रियासँग जोडिने विषय होइन । फरक विषय हो ।

त्यसैगरी, एमालेका धेरै नेताहरुमाथि अख्तियारले कारबाहीको तयारी गरेको थियो । त्यो दबाब पार्टीका माथिल्लो तहका नेतामा थियो । केही समय अघि मुलुकका प्रभावशाली २६ जना व्यक्तिमाथि अख्तियारले अनुशन्धान शुरु गरेर पत्र काटेको थियो/ तिनै २६ प्रभावशाली मध्ये १२–१५ जना सम्शदहरु अहिले महाभियोग दर्ता गराउनेमा पर्छन । यसै गरि सुडान घोटाला को अनुसन्धान गर्ने हो भने कांग्रेस मुछिने भय छ / यिनै डर र त्रासका विच लोकमान को जन्म हुन्छ, अनि उनि उन्मत्त हात्ती जस्तो नाच्छन लोकमान हाम्रै वरिपरि , हामी बन्छौ मुक दर्शक /

तपाई हामीहरु यस्तो परिबन्दमा फ़साइएका छौ कि लोकमान नहुदा अनगिन्ति घोटाला र भ्रस्टाचार माथिका छानविन हुने सम्भावना टर्छ, जुन रास्ट्र का लागि घातक छ / अनि उनि रहदा उनले हाम्रो कानुनी राज्यको अबधरणा लाई नै चुनौती दिएर कानून भनेको गिद्धलाई माकुराको जालो जस्तो बनाई दिएका छन् / यदि हामीले कुनै अमुक पार्टी भन्दा माथि उठेर तथस्ट भएर विवेकपूर्ण तरिकाले सोच्ने हो भने लोकमान हाम्रा लागि निल्नु न ओकल्नु पो भएका छन्/

अहिले लोकमान बिरुद्ध महाभियोग दर्ता भएको छ सम्शदमा / माओबादीका सम्शदहरुको नक्कली हस्ताक्षर प्रयोग भएको सुन्नमा आएको छ / नक्कली हस्ताक्षर भएर दर्ता गरिएको महाभियोगलाई अब सम्शद्ले कसरि लिने हो, सम्शद नै जानोस ! अब हामीले जान्न चाहेको यदि लोकमान हटाईए भने अर्का लोकमान नआउने ग्यारेन्टी यो संबिधान र सम्शदले गर्छ कि गर्दैन ? हामीलाई डर लोकमान व्यक्तिको होइन , बरु लोकमान बनाउने प्रवृतिको हो / बारम्बार गल्ति गर्ने दलहरुलाइ कसले, कहिले बुद्धि भरिदिने हो ? बहुदलमा दलहरुको विकल्प छैन , नेताहरु पनि आयात गर्न सकिदैन , तर अफसोच ! हाम्रो वरिपरि हाम्रै दलहरुले भागबन्डाका आधारमा बनाएका हजारौ लोकमानहरुलाई कहिल्यै महाभियोग लाग्ला ? भागबन्डाका आधारमा लोकमान बनाउने प्रवृतिबाट हामी नेपालीहरुले कहिल्यै छुटकारा पाईएला ?