दिदि ,मात्र तिमीले दिपावली गर्दै रहनू /

दिदि ,

अहिले पनि आउन पाईन क्यारे ,

भाई टिका लाउन पाईन क्यारे ,

नियत हो कि नियतिले,

यसै अल्झाईदियो यतैतिर,

अनि आज  अनायास,

अतितका यादहरु बल्झाईदियो त्यतैतिर  /

दिदि ,

आज म आउन नपाए पनि ,

त्यो ओखरलाई घज्याम्म फोड्न नबिर्सनु ल ,

प्रतीकात्मक नै सहि ,

तपाइले फोर्ने त्यो ओखर ,

मेरा लागि त कहाँ ओखर हो र दिदि ?

त्यसमा  त मेरा मित्र बनेर वरिपरि घुम्ने ,
अनि मेरै खैरो खन्ने , 

दुस्टात्माहरुको  टाउको पो देख्छु मैले !

दिदि ,

निधारमा टिका लाउन नपाएर के भो र ?

तपाईका आशिषहरुले मेरो पुर्पुरो  भरिदिन नबिर्सीनु होला,

म तिनै  तपाईले दिएका आशिषको,

डिल-डिलमा उभिएर अनन्त  हिड्न प्रयास गर्ने छु ,

तपाईले  भरेको शाहस र आसले, 

अर्को बर्षसम्म मेरा जीवन जिउने आधारहरु खोज्ने  छु  /

दिदि ,

आज म आउन नपाए पनि ,

तपाईका हातको सप्तरंगी,

टिका लाउन नपाए पनि ,

सेल रोटि पकाउन नबिर्सिनु होला ,

तपाइले पकाउने सेल रोटि ,

मेरा लागि कहाँ सेल रोटि मात्र हो र ?

त्यो त मेरो डाह र आरिस गर्नेहरुलाई ,

प्रतीकात्मक नै सहि ,

सेल रोटि पकाए जस्तै ,

तात्तातो तेलमा डुवाएको पो पाऊछु  मैले /

दिदि ,

म आउन नपाए पनि,

मखमली को माला बनाउन नबिर्सनु ल ,

मेरो सम्झनामै मात्र भए पनि ,

संघारमै सहि , त्यहि टाँसी  दिनु होला ,

त्यो माला,  मेरा लागि कहाँ माला मात्रै हो र दिदि ?

त्यसमा त मैले तपाईले  बर्सौ देखि मेरा लागि  उनेका,

रंगिन  सपना, र  रहरहरु पो देख्छु /

दिदि ,

म आउन नपाए पनि,

संगै देउसी र भैलो खेल्न नपाए पनि,

दिपावली गर्न नबिर्सनु ल,

दिदि,  तपाइले बाल्ने ति दियोहरु ,

मेरा लागि कहाँ सामान्य बत्ति हुन् र ?

ति हरेक दियोहरुमा,

मैले  मेरो उज्यालो भबिष्य देख्छु,

निष्पट औशिको अन्धकारमा पनि ,

मैले मेरो जीवन मार्ग पहिल्याउन सक्छु,

दिदि , मात्र तिमीले दिपावली गरि रहनू /