उसले हिंडेको बाटो

तिमी  र उ ,

फरक-फरक, 

दुइ  थान जिन्दगि !

बाहिरीबाट झट्ट  हेर्दा, 

संगै पढेका, संगै हुर्केका , संगै खेलेका, 

तिमी र उसले ले हिड्ने बाटाहरु एउटै थिए, 

तिमीहरु  बस्ने बस्तिहरु पनि  एउटै थिए, 

तिमीले पनि एउटा भोको पेट भर्ने भनेरै भौतारिएका जस्तो देखिन्थ्यौ ,

अनि उसले  पनि भोकाएर भोजनकै लागि  भौतारिएको जस्तो देखिन्थ्यो, ,

दुबैका जिन्दगि उस्तै उस्तै देखिन्थे   , 

तर आजकल तिमी उस्तै देखिन्छौ,

उ बेग्लै देखिन्छ ! 

तिमीलाई तिमीले  बोकेको भारीले 

च्याप्दा -च्याप्दा, 

हिड्नै नसक्ने हुँदा  पनि ,

तिमीले कहिल्यै बिसाउन चाहेनौ,

निरन्तर हिडी रह्यौ  , 

आफ्नै गतिमा,

तिमीलाई  मतलब भएन,

संगै हिडेका को कहाँ पुगे,

अथवा कसले भारी संगै बोकेर हिडे ,

अथवा कसले भारी बिसाएर कुदे,

मात्र सम्झी रह्यौ ,

तिमीले त्यो भारी छोड्न हुँदैन, 

त्यसैले निरन्तर बोकिरहयौ ! 

सकेपनि बोक्यौ, नसके पनि बोक्यौ। 

तर तिमीलाई  के थाहा ?

उसले बोकेको  त्यो भारी, 

उहिल्यै पहाडको  फेदमै  बिसाएर,  

ऊ  चुचुरोमा पुगिसकेको थियो !

आजकल, 

उसको  सफलता देखेर  

तिमीलाई पनि लाग्दो हो, 

म पनि हिडिदिञ्छु उसकै बाटोमा,

बिसाएर भारी, 

नैतिकता र चरित्रको,

सत्य र न्यायको, 

सत्कर्म र धर्मको  !  

उसको  सफलता  देखेर  

तिमीलाई  पनि  लाग्दो  हो,

मैले पनि उसले जस्तै गरिदिउ ?

अँह , हुन्न साथी, 

बरु असफल नै भएर मर ,

तर उ हिडेको बाटो कहिल्यै नहिंड !